కాంగ్రెస్‌ వైఖరిపై కిషన్‌రెడ్డి విమర్శలు
ప్రజా తీర్పును గౌరవించడం అలవాటు లేదని ఆరోపణ
రాహుల్‌ గాంధీ తీరులో ప్రమాదకర ధోరణులు
రాజ్యాంగ సంస్థల విశ్వసనీయతను దెబ్బతీస్తున్నారని మండిపాటు
ఎన్నికల సంఘం, కాగ్‌, న్యాయవ్యవస్థపై ప్రచారమంటూ వ్యాఖ్యలు
హైదరాబాద్‌, అక్టోబర్‌ 9 (కొత్త‌స్వ‌రం) :
కాంగ్రెస్‌ పార్టీకి, ప్రతిపక్ష నేత రాహుల్‌ గాంధీకి ప్రజా తీర్పును గౌరవించడం అలవాటు లేదని కేంద్ర మంత్రి కిషన్‌రెడ్డి విమర్శించారు. తమకు అనుకూలంగా ఎన్నికల ఫలితాలు వచ్చినప్పుడే ప్రజాస్వామ్యం ఉన్నట్లు భావిస్తున్నారా? అని ప్రశ్నించారు. ఫలితాలు వ్యతిరేకంగా వస్తే రాజ్యాంగ సంస్థలపై విమర్శలు చేస్తారా? అని నిలదీశారు. రాహుల్‌ గాంధీ వ్యవహారశైలిలో వింతైన, ప్రమాదకరమైన ధోరణులు కనిపిస్తున్నాయని ఆరోపించారు. కాంగ్రెస్‌ పార్టీ తన రాజకీయ ప్రయోజనాలకు అనుగుణంగా వ్యవహరించని సందర్భాల్లో ఎన్నికల సంఘం, కాగ్‌, న్యాయవ్యవస్థ, పార్లమెంటు వంటి రాజ్యాంగ సంస్థల విశ్వసనీయతను దెబ్బతీసే ప్రయత్నం చేస్తోందని కిషన్‌రెడ్డి విమర్శించారు. ప్రజా తీర్పు తమకు అనుకూలంగా లేకపోతే కీలక సంస్థలపై అవినీతి ఆరోపణలు చేస్తూ ప్రచారానికి దిగుతోందని మండిపడ్డారు. రాజ్యాంగ సంస్థలపై ప్రజలు ఉంచిన నమ్మకాన్ని దెబ్బతీసేలా కాంగ్రెస్‌ వ్యవహరిస్తోందని ఆయన ఆరోపించారు.
