• ఐజేయూ సెమినార్‌లో వక్తల ఉద్ఘాటన
• భావ ప్రకటనా స్వేచ్ఛను కాపాడాలి
• జర్నలిస్టులపై పెరుగుతున్న ఒత్తిళ్లను అడ్డుకోవాలి
• వర్కింగ్ జర్నలిస్టుల చట్టాల రద్దుపై ఆందోళన
• జర్నలిస్టుల రక్షణకు ఐక్య పోరాటం అవసరం

బెంగళూరు, ఆగస్టు 8 (కొత్త స్వరం):
భారత రాజ్యాంగం కల్పించిన భావ ప్రకటనా స్వేచ్ఛ హక్కును కాపాడాల్సిన అవసరం ఉందని పలువురు వక్తలు ఉద్ఘాటించారు. దేశంలో పాలకవర్గాల నియంతృత్వ పోకడలు పెరుగుతున్న ప్రస్తుత పరిస్థితుల్లో జర్నలిజాన్ని, జర్నలిస్టులను రక్షించాల్సిన అవసరం మరింత ఉందని పేర్కొన్నారు. ఇండియన్ జర్నలిస్ట్స్ యూనియన్ (ఐజేయూ), కర్ణాటక స్టేట్ జర్నలిస్ట్స్ యూనియన్ (కేఎస్‌జేయూ) సంయుక్త ఆధ్వర్యంలో ‘జర్నలిజం మరియు వర్కింగ్ జర్నలిస్టులకు రక్షణ అవసరమా?’ అనే అంశంపై శనివారం బెంగళూరులోని బెంగళూరు గేట్ హోటల్ సెమినార్ హాలులో సదస్సు నిర్వహించారు.

ఐజేయూ అధ్యక్షులు బల్విందర్ సింగ్ జమ్మూ అధ్యక్షతన జరిగిన ఈ సదస్సుకు సుప్రీంకోర్టు మాజీ న్యాయమూర్తి జస్టిస్ బి. సుదర్శన్ రెడ్డి ముఖ్య అతిథిగా హాజరయ్యారు. ‘ది వైర్’ వ్యవస్థాపక సంపాదకుడు సిద్ధార్థ్ వరదరాజన్ కీలక ఉపన్యాసం చేశారు. తెలంగాణ మీడియా అకాడమీ చైర్మన్ కే. శ్రీనివాసరెడ్డి, కర్ణాటక మీడియా అకాడమీ చైర్‌పర్సన్ అయేషా ఖనూం తదితరులు పాల్గొన్నారు.

జర్నలిస్టులకు రక్షణ అవసరం

జస్టిస్ బి. సుదర్శన్ రెడ్డి మాట్లాడుతూ.. 2020లో రద్దయిన రెండు వర్కింగ్ జర్నలిస్టుల చట్టాలతో పాటు మొత్తం 13 చట్టాల రద్దు అంశాన్ని ప్రస్తావించారు. వర్కింగ్ జర్నలిస్టుల చట్టాల రద్దుకు సంబంధించిన ప్రత్యేక కారణాలు, వివరణను పార్లమెంటుకు ఇవ్వలేదని గుర్తుచేశారు. ఈ రద్దు నిర్ణయాన్ని న్యాయస్థానంలో సవాలు చేయడానికి చట్టంలో ఏదైనా అవకాశం ఉందా అని ప్రశ్నించారు.

మీడియా కేవలం వార్తలను ప్రసారం చేసే సంస్థగా కాకుండా నిష్పాక్షికంగా వ్యవహరించే రిఫరీ పాత్రను పోషించాలని సూచించారు. ఆధునిక, డిజిటల్ మీడియాలో పనిచేసే జర్నలిస్టులు తాము నివేదించే అంశాలపై లోతైన అధ్యయనం చేయడంతో పాటు వాస్తవాలపై అవగాహన పెంచుకోవాలని అన్నారు. దీనివల్ల మీడియా విశ్వసనీయత గణనీయంగా పెరుగుతుందని పేర్కొన్నారు. ‘‘ఖచ్చితంగా జర్నలిస్టులకు రక్షణ అవసరం’’ అని స్పష్టం చేశారు.

రద్దు చేసిన చట్టాల గురించి వివరిస్తూ.. ప్రభుత్వం ఆకస్మికంగా ఈ నిర్ణయం తీసుకుందని, దీనిపై ఎలాంటి సంప్రదింపుల ప్రక్రియ జరగలేదని ఆవేదన వ్యక్తం చేశారు. ఇంత కీలకమైన నిర్ణయం తీసుకునే ముందు జర్నలిస్టులను సంప్రదింపుల కోసం ఆహ్వానించలేదని తెలిపారు. జర్నలిస్టులను ఇతర వృత్తుల్లో పనిచేసే వ్యక్తులతో పోల్చలేమని వివరించారు.

లా ఫేర్‌తో దాడులు

‘ది వైర్’ వ్యవస్థాపకుడు, సంపాదకుడు, సీనియర్ పాత్రికేయుడు సిద్ధార్థ్ వరదరాజన్ కీలకోపన్యాసం చేస్తూ.. భారతదేశంలో జర్నలిజానికి, జర్నలిస్టులకు రక్షణ తప్పనిసరిగా అవసరమని నొక్కిచెప్పారు. వార్‌ఫేర్ తరహాలో ప్రస్తుతం కేంద్ర ప్రభుత్వం జర్నలిస్టులకు వ్యతిరేకంగా ‘లా ఫేర్’తో దాడులకు పాల్పడుతోందని విమర్శించారు.

గతంలో వివాదాల సందర్భంలో జర్నలిస్టులు ఎదుర్కొన్న ప్రధాన ముప్పుల్లో పరువునష్టం దావాలు ఒకటిగా ఉండేవని, ప్రస్తుతం పరిస్థితులు మారాయని అన్నారు. జర్నలిస్టులు దేశద్రోహం, ఉపా తదితర తీవ్రమైన నేరాభియోగాలను ఎదుర్కొంటున్నారని పేర్కొన్నారు. ప్రజల భద్రతకు ముప్పు కలిగించే చట్టాలను ఉపయోగించి పాత్రికేయులను అణచివేస్తున్నారని ఆరోపించారు.

ప్రాథమిక హక్కులకు భంగం కలిగించే చర్యలు జరుగుతున్నాయని, జమ్మూ కాశ్మీర్‌కు పరిమితమైన ఉపా చట్టాన్ని దేశవ్యాప్తంగా అమలు చేసిన ఘనత కేంద్ర ప్రభుత్వానిదేనని విమర్శించారు. చట్టాలను, దర్యాప్తు సంస్థలను దుర్వినియోగం చేస్తున్న పరిస్థితి గతంలో ఎన్నడూ లేనంతగా ఉందన్నారు.

ప్రకటనలతో ఒత్తిడి

మీడియాపై ఒత్తిడి, ప్రభావం చూపేందుకు కేంద్ర, రాష్ట్ర ప్రభుత్వాలు ప్రకటనలు, ప్రజా సంబంధాల బడ్జెట్‌లను పరికరాలుగా ఉపయోగిస్తున్నాయని సిద్ధార్థ్ వరదరాజన్ అన్నారు. ఇది నిష్పక్షపాత జర్నలిజానికి అతిపెద్ద సవాళ్లలో ఒకటని అభివర్ణించారు.

2024 ఎన్నికల సమయంలో ప్రభుత్వం డిజిటల్ మీడియాను నియంత్రించలేకపోయిందని, అయితే ఎన్నికల అనంతరం ఐటీ చట్టాల అమలుతో డిజిటల్ ప్లాట్‌ఫారమ్‌లు, మీడియాను నియంత్రించేందుకు ప్రయత్నాలు జరుగుతున్నాయని అన్నారు. ప్రభుత్వం తదుపరి డిజిటల్ సేవల ప్రసార చట్టం ముసాయిదాను తీసుకురాబోతోందని తెలిపారు.

ప్రమాదకరమైన ఐటీ నిబంధనలు వెబ్ జర్నలిజం స్వేచ్ఛను హరించబోతున్నాయని ఆందోళన వ్యక్తం చేశారు. జర్నలిజంలో నైతిక ప్రమాణాల కోసం కృషి చేసిన ప్రెస్ కౌన్సిల్ ఆఫ్ ఇండియాను నిర్వీర్యం చేశారని విమర్శించారు. ఐ అండ్ బీ మంత్రిత్వ శాఖ ఫ్యాక్ట్ చెకింగ్ యూనిట్ వార్తల నిజనిర్ధారణను తేల్చాల్సిన పరిస్థితి ఏర్పడటం దురదృష్టకరమన్నారు.

ఢిల్లీలో మెజార్టీ జర్నలిస్టులకు పీఐబీ కార్డులు లేకపోవడం రాజధానిలో జర్నలిస్టుల దారుణ పని పరిస్థితులకు అద్దం పడుతోందని అన్నారు. జర్నలిస్టులకు, జర్నలిజానికి రక్షణ కల్పిస్తే ప్రజలకు రక్షణ కల్పించినట్లేనని పేర్కొన్నారు. ఏ ఒక్క ఛానల్ కూడా స్వతంత్రంగా వ్యవహరించే పరిస్థితి లేదని ఆవేదన వ్యక్తం చేశారు. ప్రభుత్వానికి వ్యతిరేకంగా వార్తలు ప్రసారం చేస్తే జాతీయ భద్రత సాకుతో ప్రసార లైసెన్సులు రద్దు చేసి ఛానళ్లను మూసివేస్తున్నారని ఆరోపించారు.

నాలుగు కార్మిక కోడ్‌లపై వ్యతిరేకత

తెలంగాణ మీడియా అకాడమీ చైర్మన్ కే. శ్రీనివాసరెడ్డి మాట్లాడుతూ.. స్వాతంత్ర్యోద్యమం అనంతరం నాయకులు జర్నలిస్టుల హక్కులు, వారి పని పరిస్థితుల మెరుగుదలపై దృష్టి సారించారని అన్నారు. అయితే నేటి నాయకులు మీడియా హక్కుల హననంపై ఆసక్తి చూపుతున్నారని విమర్శించారు.

జర్నలిస్టులకు సంబంధించిన రెండు చట్టాలతో పాటు 13 చట్టాలను రద్దు చేసి ఏర్పాటు చేసిన నాలుగు కార్మిక కోడ్‌లకు వ్యతిరేకంగా కేంద్ర కార్మిక సంఘాల ఆధ్వర్యంలో జరిగిన ఆరు జాతీయ సమ్మెలకు ఐజేయూ మద్దతు ఇచ్చిందని గుర్తుచేశారు. వర్కింగ్ జర్నలిస్టుల చట్టాల రద్దుకు వ్యతిరేకంగా పార్లమెంటరీ కమిటీకి వినతిపత్రం ఇచ్చామని తెలిపారు.

నాలుగు కోడ్‌ల నోటిఫికేషన్‌ను అమలు చేయకుండా నిలిపివేసిన కర్ణాటక, తమిళనాడు, కేరళ రాష్ట్రాల స్ఫూర్తిని అభినందించారు. ఈ సెమినార్ ఐజేయూ భవిష్యత్ కార్యాచరణకు దిశానిర్దేశం చేస్తోందని శ్రీనివాసరెడ్డి అన్నారు.

జర్నలిస్టులు ఏకం కావాలి

కర్ణాటక మీడియా అకాడమీ చైర్‌పర్సన్ అయేషా ఖనూం మాట్లాడుతూ.. జర్నలిస్టులందరూ ఒకే వేదికపై ఏకం కావాలని పిలుపునిచ్చారు. జర్నలిస్టులు విడిపోయి ఉండటం వల్ల విశ్వసనీయత తగ్గుతుందని పేర్కొన్నారు.

జర్నలిస్టుల రక్షణ బిల్లు ముసాయిదా తయారీ గురించి చాలామంది జర్నలిస్టులకు అవగాహన లేదని చెప్పారు. అందువల్ల ఇటువంటి వేదికల ద్వారా సమాచారాన్ని పంచుకోవడం, ప్రచారం చేయడం ఎంతో ముఖ్యమని అన్నారు.

ఐజేయూ సెక్రటరీ జనరల్ డి. సోమసుందర్ అతిథులకు, సభికులకు స్వాగతం పలికారు. ఐజేయూ మాజీ అధ్యక్షులు ఎస్.ఎన్. సిన్హా, అమర్ దేవులపల్లి, సీనియర్ జర్నలిస్ట్ అబ్దుల్ రజాక్ కూడా సదస్సులో ప్రసంగించారు.

ఐజేయూ జాతీయ కార్యవర్గ సమావేశ ప్రారంభోత్సవంలో ముఖ్య అతిథి జస్టిస్ సుదర్శన్ రెడ్డి, ముఖ్య వక్త సిద్ధార్థ్ వరదరాజన్, ఇతర ప్రముఖులు జ్యోతి ప్రజ్వలన చేశారు. కర్ణాటక స్టేట్ జర్నలిస్ట్స్ యూనియన్ సదస్సుకు హాజరైన ప్రముఖులను సత్కరించింది. కర్ణాటక స్టేట్ జర్నలిస్ట్స్ యూనియన్ అధ్యక్షురాలు జానకి మోహన్ వందన సమర్పించారు.

ఈ సమావేశంలో ఆంధ్రప్రదేశ్ నుంచి ఏపీయూడబ్ల్యూజే రాష్ట్ర అధ్యక్షులు ఐవీ సుబ్బారావు, ప్రధాన కార్యదర్శి కంచల జయరాజు, ఐజేయూ జాతీయ కార్యవర్గ సభ్యులు కూన అజయ్ కుమార్, ఈ.ఎన్. రాజు, రాష్ట్ర కార్యదర్శి ఏ. సురేష్, ఏపీ ఎలక్ట్రానిక్ మీడియా జర్నలిస్ట్ అసోసియేషన్ రాష్ట్ర కార్యవర్గ సభ్యులు తదితరులు పాల్గొన్నారు.

బెంగళూరులో ఆగస్టు 8, 9 తేదీల్లో జరుగుతున్న ఐజేయూ జాతీయ కార్యవర్గ సమావేశాల్లో భాగంగా తొలిరోజు ఉదయం ఈ సదస్సును నిర్వహించారు.