విశాఖకు 200, శ్రీకాకుళానికి 150 కి.మీ. దూరంలో డీప్ డిప్రెషన్

పలు ప్రాంతాల్లో ఇప్పటికే 100 మి.మీ. వర్షపాతం

శ్రీకాకుళం సమీపంలో తీరం దాటే అవకాశం

200–250 మి.మీ. వరకు అత్యంత భారీ వర్షాలు

24 గంటలు అత్యవసరం కాని ప్రయాణాలు నివారించండి

కొత్త స్వరం, విశాఖపట్నం, సెప్టెంబర్ 23: డీప్ డిప్రెషన్ ప్రస్తుతం విశాఖపట్నానికి 200 కి.మీ., శ్రీకాకుళానికి 150 కి.మీ. దూరంలో ఉండగా, ఉత్తరాంధ్రలోని అనేక ప్రాంతాల్లో మోస్తరు నుంచి భారీ వర్షాలు కురిశాయి. కొన్ని ప్రాంతాల్లో ఇప్పటికే 100 మి.మీ. వరకు వర్షపాతం నమోదైంది. సెప్టెంబర్ 23న మధ్యాహ్నం నుంచి రాత్రి మధ్య శ్రీకాకుళం సమీపంలో వ్యవస్థ తీరం దాటే అవకాశం ఉండటంతో విశాఖపట్నం, విజయనగరం, శ్రీకాకుళం, అనకాపల్లి జిల్లాల్లో ఈ రాత్రి నుంచి వర్ష తీవ్రత మరింత పెరిగే అవకాశం ఉందని హెచ్చరికలు జారీ అయ్యాయి. సెప్టెంబర్ 23 సాయంత్రం వరకు కొన్ని ప్రాంతాల్లో 200–250 మి.మీ. వరకు అత్యంత భారీ వర్షపాతం నమోదయ్యే అవకాశం ఉందని, ఉత్తరాంధ్ర ప్రజలు అప్రమత్తంగా ఉండాలని, రాబోయే 24 గంటల పాటు అత్యవసరం కాని ప్రయాణాలను నివారించాలని సూచించారు. ఉత్తర కోస్తా ఆంధ్రలో గంటకు 50–60 కి.మీ. వేగంతో బలమైన గాలులు వీచే అవకాశం ఉందని హెచ్చరించారు.